ადამიანები თავიანთი ხასიათის თვისებებით სხვადასხვა ფსიქოტიპებად იყოფიან. ერთნი თუ მშვიდობისმოყვარეობით და დიპლომატიის უნარით არიან დაჯილდოებულნი, მეორე ნაწილს სიფიცხე, უკომპრომისობა და ექსტრიმის სიყვარული ახასიათებს. ზოდიაქოს ნიშნების მიხედვით 12 უმთავრესი ფსიქოტიპი გამოიყოფა. თუმცა პირადი კოსმოგრამის მიხედვით, ვხვდებით ე.წ. "შერეულ ტიპაჟებსაც" – მაგ. ლომი მორიელის გავლენით, ვერძი თხის რქის ან კირჩხიბის გავლენით და ა.შ. თუმცა ამჯერად საუბარი არა შერეულ ფსიქოტიპებზე, არამედ შეუთავსებელ ინდივიდებზე ე.წ. "კრადრატურულ ურთიერთობაზე" გვექნება.

კვადრატურა ნიშნავს 90-გრადუსიან დაშორებას ნიშნებს შორის. სწორედ ამგვარი კონფიგურაციის მქონე ადამიანები აწყდებიან ურთიერთობისას ყველაზე დიდ პრობლემებს, რომელთა მოსაგვარებლადაც კვადრატურის მქონე წყვილებმა (ან საქმიანმა პარტნიორებმა) მუდმივად უნდა იმუშაონ საკუთარ თავზე, მუდმივად უნდა ეძებონ გზა კომპრომისისა და დათმობისთვის. თუ კიდევ ერთი დაძაბული ასპექტი ოპოზიცია (180-გრადუსიანი დაპირისპირება) შექმნილ პრობლემებს საერთო ინტერესების აღმოჩენის კუთხით აგვარებს, კვადრატურა გაცილებით უფრო რთული ფენომენია და მისი დარეგულირება მარტივად არასოდეს ხდება. ამიტომ, როცა ჩვენ ცხოვრებაში გვიწევს ჩვენგან მეოთხე ნიშანთან (კვადრატურასთან) ურთიერთობის დაწყება, უნდა ვიცოდეთ კონკრეტულად რა გზას მივმართოთ საიმისოდ, რომ ურთიერთობა იშვიათად დაიძაბოს და ჩვენი ინტერესები ნაკლებად მოვიდეს ერთმანეთთან დისონანსში.

განვიხილოთ რამდენიმე კონკრეტული მაგალითი:

ლომი-მორიელი ამ ტიპის კვადრატურა ძირითადად ძალაუფლის გამო წარმოქმნილი დაპირისპირებით ხასიათდება. არ აქვს მნიშვნელობა ურთიერთობა პარტნიორულია თუ საქმიანი, ორივე შემთხვევაში ლომისთვის დამახასიათებელი მეფური მანერები, დომინანტობისკენ სწრაფვა და საკუთარი პერსონის ხაზგასმა ძალიან აღიზიანებს არანაკლებ პატივმოყვარე და ამბიციურ მორიელს. მათ შორის ომი ძირითადად ლიდერობისთვის მიდის. როგორც ლომს, ისე მორიელს მოსწონს ადამიანებისა და სიტუაციის კონტროლი თავის გარშემო. ამიტომ, როცა ამ ორის ინტერესები ეჯახება, არც ერთი არ თმობს. ორივე საკმარისზე მეტად ამაყი და პრინციპულია. ერთსაც და მეორესაც ახასიათებს მტრების მიმართ შეუწყნარებლობა და ამტანობა კრიტიკულ სიტუაციაში

ზავის მეთოდები: საიმისოდ, რომ ამ ორმა შესძლოს ერთად თანაარსებობა, აუცილებელია კომპრომისი. იმ შემთხვევაში თუ ლომი გააცნობიერებს მორიელის როგორც ჭკვიანი, წინდახედული და მობილიზებული მოკავშირის მნიშვნელობას, მორიელი კი ლომის სახით საჭირო კონტაქტების შეძენის პერსპექტივასა და საზოგადოებაში საკუთარი იმიჯის კარგად შეფუთვის საშუალებას, მათგან შეიძლება არაჩვეულებრივი წყვილი დადგეს. ერთად ისინი დიდ სიმაღლეებს დაიპყრობენ, როგორც კარიერული, ისე პირადი ცხოვრების კუთხით.

თხის რქა-სასწორი კონსერვატორ, პირქუშ და ემოციურად თავშეკავებულ თხის რქას, საშინლად აღიზიანებს სასწორის სირბილე და ლოიალური ხასიათი. თხის რქა ბუნებით ჯიუტი და უკომპრომისოა. მაშინ როცა სასწორი ჰარმონიას მხოლოდ და მხოლოდ გარშემო მყოფებთან კომპრომისის ხელოვნებაში ხედავს. თუმცა იმ შემთხვევაში როცა მას რამეს აძალებენ, შეუძლია გასაოცარი სიჯიუტეც გამოავლინოს. სწორედ ეს არის ამ ორ ერთი შეხედვით შეუთავსებელ ადამიანს შორის მთავარი მაკავშირებელი რგოლი. თხის მმართველი პლანეტა სატურნისთვის ხომ სასწორის ზოდიაქოა ეგზალტაციის ზონა.

ზავის მეთოდები: თხის რქამ უნდა დაინახოს, რომ სასწორზე კარგად მისი იმიჯის შესახებ არავის შეუძლია ზრუნვა. მას შეუძლია თხის რქის პირქუში იმიჯი შეარბილოს საზოგადოების თვალში. სასწორმა კი თხის რქის პრაქტიკულობა უნდა გამოიყენოს, განსაკუთრებით
ფინანსურ სფეროებში.

თევზები-მშვილდოსანი უმთავრესი პრობლემა ამ ორს შორის მშვილდოსნის დაუკვირვებელი საუბარის მანერა და თევზების ემოციური ბუნებაა. ტიპიური მშვილდოსანი ნაკლებად არჩევს სიტყვებს საუბრისას და რასაც ფიქრობს, ყოველთვის ალალად და დაუფარავად ამბობს. მაშინ როცა ბუნებით სათუთი და ემოციური თევზები, მძაფრად რეაგირებენ ნებისმიერი სახის კრიტიკაზე და ცდილობენ თავადაც ნაკლებად აკრიტიკონ სხვა, მშვილდოსნის ვერბალური თავდასხმა თევზების ემოციურ ბუნებას დიდ დარტყმას აყენებს. ამის გამო შეიძლება მათ შორის სერიოზული კონფლიქტი წარმოიშვას.

ზავის მეთოდები: მშვილდოსანს უნდა ახსოვდეს, რომ თევზებს ძალიან მდიდარი შინაგანი სამყარო აქვთ, ამიტომ მისი მაძიებელი ბუნებისთვის თევზებისნაირი ადამიანი სამომავლოდ შესაძლოა საკმაოდ საინტერესო თანამოსაუბრე და მეგობარი გახდეს. თევზები კი თავის მხრივ მშვილდოსნის სახით შესანიშნავ "ანტიდეპრესანტს" შეიძენს. რომელიც მას დეპრესიული განწყობის პერიოდული შემოტევებისას დაეხმარება და ცხოვრების რწმენას დაუბრუნებს.

ვერძი-კირჩხიბი ენერგიული, უკომპრომისო და თამამი ვერძი ვერ ეგუება კირჩხიბის ხასიათში გადამეტებულ ემოციურობასა და პარანოიამდე დასულ სიფრთხილეს. ვერძი ბუნებით ლიდერია, მისთვის ძალზე მარტივი საქმეა რისკზე წასვლა, მაშინ როცა ბუნებით წინდახედული კიბორჩხალა, ასჯერ გადაზომავს თითოეული ნაბიჯის გადადგმამდე. რაღა თქმა უნდა, ვერძს ეს არ მოეწონება და კიბორჩხალას აუცილებლად უწოდებს ლაჩარს. რაც ამ უკანასკნელის განაწყენებას გამოწვევს, თანაც საკმაოდ ხანგრძლივი დროით.

ზავის მეთოდები: ამგვარი კვადრატურა ერთ-ერთი ყველაზე რთული კავშირია დანარჩენ პრობლემატურ კავშირებს შორის. თუმცა თუ ვერძი ისწავლის უკმეხობა დაძლიოს კირჩხიბთან ურთიერთობისას, მისი სახით კარგ მრჩეველსა და მზრუნველ მეგობარს აღმოაჩენს. რომელიც ყოველთვის იზრუნებს მის კეთილდღეობაზე და ფინანსური გასაჭირის დროს (რაც ვერძების შემთხვევაში ხშირია!) ხელსაც გაუმართავს. თავის მხრივ კი კირჩხიბი, ვერძის სახით, საიმედო დამცველსა და მოტივატორს შეიძენს. რომელიც იმედგაცრუებულ კირჩხიბს ყოველთვის გამოუკეთებს ხასიათს.
წყარო: astrologi.ambebi.ge