გორის მერი შვებულებიდან დაბრუნდა

გორის მერი ახალუბანში ჩავიდა. შვებულებიდან დაბრუნებული კოტე თავზარაშვილი ერთ-ერთი გატახცებულის ოჯახს შეხვდა.

იგი აცხადებს, რომ დასასვენებელად იმყოფებოდა და ვერანაირ პრობლემას ვერ ხედავს იმაში, რომ საოკუპაციო ხაზთან არსებულ სოფლებში მხოლოდ დღეს ჩავიდა. მისი თქმით, შვებულებაში მას შემდეგ გავიდა, რაც გუგუტიანთკარში 7 აგვისტოს შემდეგ ვითარება დამშვიდდა.

თავზარაშვილის თქმით, პირადად მისი არყოფნით არაფერი დაშავებულა, რადგან ადგილზე მუდმივად მუშაობდა მისი მოადგილე და წარმომადგენელი და ოფიციალურ სტრუქტურებს მუდმივად მიეწოდებოდათ ინფორმაცია.

„სად ვიყავი ამდენ ხანს, ამას იმნაირი მნიშვნელობა არ აქვს, ჯერჯერობით, ყველაზე მთავარია ეს 7 ბიჭი, რომელიც გამყოფი ხაზის მიმდებარე სოფლიდან ახალუბნიდან გაიტაცეს რუსებმა და გადაიყვანეს იქით მხარეს, ჩვენი ძირითადი მიზანია, რომ ესენი, რაც შეიძლება მალე დავუბრუნოთ თავის სახლებს. ამისთვის ყველაფერი კეთდება, ჩართულია შესაბამისი ორგანოები, ჩართულია მთავრობის ადმინისტრაცია, საგარეო საქმეთა სამინისტრო და ყველაფერი კეთდება, რომ ძალიან მალე დაუბრუნდნენ თავიანთ სახლებს“, - ამბობს თავზარაშვილი.

მერი გუგუტიანთკარში მიმდინარე პროცესებსაც ეხმაურება.

„რაც შეეხება გუგუტიანთკარს, აქაც ყველა ჩართულია, მეც ყველანაირი ინფორმაცია მქონდა ამის შესახებ და დარწმუნებული ვარ, რომ როგორც ევროკავშირის სადამკვირვებლო მისია, ასევე საგარეო საქმეთა სამინისტრო, მთავრობის ადმინისტრაცია ყველაფერს აკეთებენ, რომ მიაწვდინონ ხმები ჩვენს მეგობარ ქვეყნებს, რომლებიც ყველაფერს გააკეთებენ იმისთვის, რომ აღმოიფხვრას ეს უკანონო ქმედება ჩვენს ტერიტორიაზე ოკუპანტების, რომლებიც ყოველდღიურად წევენ ამ საზღვრებს აქეთ,“ - განაცხადა თავზარაშვილმა.

გორის მერი ვერ ამბობს რა გეგმით გააგრძელებს მუშაობას არსებული პრობლემის მოსაგვარებლად მომდევნო დღეებში.

მას შეხვედრაზე ახლდა მისი წარმომადგენელი მეჯვრისხევში, რომელიც ჟურნალისტების მიმართ აგრესიული ქმედებებით გამოირჩეოდა და მათ მუშაობას იღებდა. ჟურნალისტების შეკითხვაზე, თუ რა ვითარებაა ამ დროისთვის მეჯვრისხევიდან გატაცებულ მოქალაქესთან დაკავშირებით, მერის წარმომადგენელმა პასუხი ვერ გასცა.
704
4 წლ, 7 თ წინ