საქართველოს 8 მოქალაქე კვლავ ცხინვალის წინასწარი დაკავების იზოლატორში იმყოფება. უცნობია, როდის გაათავისუფლებენ მათ დე ფაქტო ხელისუფლების წარმომადგენლები. სუს-ში აცხადებენ, რომ ყველა შესაბამისი უწყება ინფორმირებულია, მათ შორის, ევროკავშირის სადამკვირვებლო მისიაც.

ახალუბნელები კი შეშინებულები არიან და დახმარებას ითხოვენ. სოფლიდან გუშინ ოკუპანტებმა 7 მოქალაქე გაიტაცეს.

მოსახლეობა ამბობს, რომ საკმაოდ დიდ პერიმეტრზე არ არის აღნიშვნა გაკეთებული, რომ ადგილობრივები მიხვდნენ, სად არის ე.წ. საზღვარი, რომელსაც არ უნდა გადასცდნენ. თუმცა, მოსახლეობა ამბობს, რომ რუსი ოკუპანტები მაშინაც კი იტაცებენ მოქალაქეებს, თუ ისინი ე.წ. საზღვარს თუნდაც 50 მეტრზე მიუახლოვდებიან.

„ძროხები რომ მიჰყავთ საძოვარზე, მიდიან და იტაცებენ, ხშირ-ხშირად ხდება... რუსის ჯარი უნდა გაიყვანონ და მაშინ გვეშველება, ოსები ჩვენ არაფერს არ გვიშლიან. რუსების ზემოქმედებით არიან, აბა რითი. თუ მიახლოვდები 50 მეტრში დაგინახავენ, მოდიან და მიჰყავხარ - ძაღლები, ავტომატები, თვითონ ჯარისკაცები და ვის გაუძალიანდები, იარაღიან ხალხს როგორ გაუძალიანდები“, - ამბობს ერთ-ერთი ადგილობრივი.

ადგილობრივები ამბობენ, რომ საკმაოდ შეშინებულები არიან ოკუპანტების მიერ მათი თანასოფლელების გატაცების გამო.

„გვეშინია, ხანდახან ზემოთ აძოვებს ხოლმე ძროხას და მეშინია, გავძახებ ხოლმე, რომ რავი არ წაიყვანონ. იქით აძურა არის, იმის იქით არიან, აქეთ ვერ გადმოდიან. წმინდა გიორგი ტრაფარეტიც არის და აქამდეაო და მერე სადამდე ჩამოვა, ღმერთმა იცის“, - ამბობს ადგილობრივი.

ბოლო ორი დღის განმავლობაში ოკუპანტებმა 8 ადამიანი გაიტაცეს. დე ფაქტო ხელისუფლების წარმომადგენლები ამბობენ, რომ ისინი არაფხიზელ მდგომარეობაში იმყოფებოდნენ. თუმცა, როდის გაათავისუფლებენ დაკავებულებს, საოკუპაციო რეჟიმის წარმომადგენლები არ აკონკრეტებენ.